वीरगञ्जको मुख्य सडक विस्तारका लागि आइतबार बिहानैदेखि डोजर चलाइएको छ। त्रिभुवन राजपथअन्तर्गत पर्ने मेनरोड फराकिलो बनाउने काम अन्तर्गत सडक दायाँ–बायाँका संरचना भत्काउन थालिएको हो।

सडक डिभिजन कार्यालय हेटौंडाको समन्वयमा गण्डक चोकदेखि भारतको रक्सौल सीमास्थित मितेरी पुलसम्म सडक विस्तार गर्ने योजना अनुसार भत्काउने काम अघि बढाइएको छ। आइतबार बिहान साढे ४ बजेदेखि घण्टाघर क्षेत्रबाट डोजर परिचालन गरिएको हो।

सडक क्षेत्रमा अतिक्रमण गरी बनाइएका घर, पसल तथा अन्य संरचना हटाउन सडक डिभिजनका डोजर, जेसीबी र एक्साभेटर गरी ९ वटा उपकरण र वीरगञ्ज महानगरपालिकाका ४ वटा डोजर प्रयोग गरिएको छ।

यसअघि शनिबार माइकिङमार्फत सडक क्षेत्रमा पर्ने संरचना खाली गर्न सूचना दिइएको थियो। सूचनापछि केही व्यापारीले आफ्नो सामान बेच्न ‘सेल’ समेत सञ्चालन गरेका थिए।

मुख्य सडकको केन्द्रबिन्दुबाट दायाँ–बायाँ २५/२५ मिटर क्षेत्रभित्र पर्ने सबै संरचना हटाइने जनाइएको छ। यसका लागि जिल्ला सुरक्षा समिति, वीरगञ्ज महानगरपालिका र सम्बन्धित निकायबीच समन्वय गरेर रणनीति तय गरिएको थियो।

जिल्ला सुरक्षा समिति पर्साका संयोजक तथा प्रमुख जिल्ला अधिकारी भोला दहालका अनुसार आइतबारदेखि सडक विस्तारको काम औपचारिक रूपमा सुरु गरिएको हो।

जिल्ला प्रशासन कार्यालय पर्साले सार्वजनिक सूचना जारी गर्दै वैशाख ६ गते बिहान साढे ४ बजेसम्म सडक क्षेत्रभित्र पर्ने सम्पूर्ण संरचना खाली गर्न निर्देशन दिएको थियो। सोही सूचनाअनुसार आइतबारदेखि कार्यान्वयन सुरु गरिएको हो।

सर्वोच्च अदालतको २०८१ फागुन २८ गतेको फैसलापछि मेनरोड विस्तारको बाटो खुलेको थियो। लामो समयदेखि विवादका कारण रोकिएको काम अब अघि बढाइएको हो।

यसअघि २०६९ सालदेखि नै सडक विभागले २५/२५ मिटर मापदण्डअनुसार संरचना हटाउन सूचना जारी गर्दै आएको थियो। तर, घरधनीको विरोध र अदालतमा मुद्दा परेपछि काम अघि बढ्न सकेको थिएन।

गण्डकदेखि भन्सारसम्मको करिब तीन किलोमिटर सडकखण्ड साँघुरो हुँदा ट्राफिक व्यवस्थापनमा समस्या देखिँदै आएको थियो भने मुख्य बजार क्षेत्रको स्वरूपसमेत प्रभावित भएको थियो।

हाल सर्वोच्च अदालतको निर्णयअनुसार संघीय सडक सुपरिवेक्षण तथा अनुगमन कार्यालय र सडक डिभिजन हेटौंडाले महानगरसँग समन्वय गरेर काम अघि बढाएका हुन्। महानगरले सुरक्षा निकायसँग सहकार्य गर्दै सडक विस्तार कार्यलाई तीव्रता दिएको जनाएको छ।